Message to all indigenous Fijians

Ni ra a vesu toka na Gone Marama Bale na Roko Tui Dreketi kei iratou na Talatala ni Lotu Wesele ena Guardhouse mai Delainabua (QEB) enabogi, ratou cakava toka na mateni o Voreqe, Teleni, Driti, Ului kei ira kece na senior officers era sa vodoka toka na Gravy Train, ena RFMF mess, ena bogi. Ratou gunu toka me ratou vakadeitaka ni oratou, na tamata qaqa taudua e Viti, ka ni ratou vesuki ira rawa na Gone Marama Bale, kei ira na Talatala ni Kalou. Ko ya gona na lotu ra cakava tiko na sotia ni Viti – ratou rumrum, whiskey toka. Ia, e sega ni ura me tei damu gonei!
Matata vakasigalevu, ni lai vesu mai na Gone Marama Bale, kei ira na Talatala ni Kalou, ena loma ni bogi, ra vakasaurarataki tu me dua na siga taucoko, mera sega ni moce rawa vakavinaka, ni ra tovolea tiko na sotia rumrum, mera vakamalumalumutaki ira, kei keda na lewenivanua lotu vakarisito. Na dina kece qo ena qai kaburaki mai, ni ra sa tu cala o ira na sotia, kei ira kece na turaga/marama ni valu, era sa mai coko tu ena butako levu, na great train robbery, sa mai vakayacori tu ena noda vanua. Era nanuma ni da drop-out sotia dau rumrum vakataki ratou, ia e cala na nodra nanuma.
Na veibeitaki vakailasu sa mai caka qo vei ira na Gone Marama Bale, kei na Talatala ni Kalou, ena qai sauti ira lesu na mataivalu rogorogoca, e liutaka tiko o Voreqe, ka sa rairai, e nodra Kalou, na sotia dau rumrum oqo. Na nodratou lawa lasulasu, eratou sakitaka tiko qo, me rawa ga kina me kana tikoga kina na vore, mai na buno ni lewenivanua, me rawa kina ni ra vodo tikoga kina, ena gravy train qo. Eratou kila vinaka tiko, ni ratou sa na vakasoburi, sa na biu na pajero, na karua kei na katolu ni vale era sa volia rawa ena ilavo ni FDB kei na Merchant Bank, ka mera toki lesu tale ki na vale e levu kina na kokoroti, mai Delainabua, se mera toki sara ki Naboro! Ko ga ya era rerevaka tiko! Era via mai benuci ira na Gone Marama Bale, kei ira na Talatala ni Kalou, mera kaya tiko ni ra basu lawa, era via vunitaka, na laba mada ni CRW, Rabaka, Whippy, Verebasaga kei Malasebe, kei na nodra basuka na lawa, ni ra a kovea na noda Matanitu, ena Tiseba, 2006. Ia, eda sega ni lialia, se drop out vakataki ira na sotia, o keda na lewenivanua, ka matata vinaka tu vei keda, na butako, na laba, kei na basulawa ni Mataivalu nei Voreqe.
O keda na lewenivanua, meda dei, ka yaloqaqa, ni dodonu tiko na sala eda muria, me vakayacori na noda koniferedi, e Rewa, ena yabaki oqo. Era lewe 4,000 ga na sotia. Vei ira oqo, era lewe 2,000 ga era se cauravou. Ia o keda, eda lewelevu cake! – eda lewe 800,000, na lewenivanua! E sega ni dua na ka meda rerevaka, ka ni tiko vata kei keda na Kalou, ka rawarawa sara meda valuti ira na Sotia rumrum oqo.
Era lako mai ena lomaloma ni bogi, baleta oya na gauna eda moce kina, era kila ni gauna oya, e sega ni yadra vinaka kina na vakasama. Ia o keda, meda sa sasabai. Meda yadra tiko. Meda namaki ira. Vakacava kevaka eda kaya vei ira – Au sega ni kila na lawa o tukuna tiko qori! Au bese na lako! Vakacava kevaka era yadra kece mai na lewenikoro, mera kaya – Sa Yala Eke! Sa yala eke! Sa yala eke! Sa yala eke!